وش علاج الكسل؟

وش علاج الكسل؟ بإختصار بعض المرات لما تقوم من النوم تحس انك كسلان ومافيك حيل تسوي اي شيء بالحياة وتبي بس تنسدح وحتى تواصل مع الناس ماتبي, وترا هذا شيء طبيعي مره والمفروض انك ماتستلم لرغباتك هذي, عشان كذا بعطيك طرق بتخليك زي الحصان ومستحيل انك تصير كسلان بعدها.

وش طرق علاج الكسل؟ حلول بسيطة

طبعاً قبل كل شيء لازم تعرف أن المتعه اللي تحصل عليها وانت منسدح ولا ماتسوي شيء فيها هي من افضل المتع في الحياة بس ترا واجب عليك وضروري انك تحل هالمشكلة, والحل بسيط جداً .. خلك معي وبتصير حصان.

  • حدد مهامك وواجباتك

الخطوة هذي مهمة وضرورية جداً في طريقك للحصول على رشاقة الحصان, معروف اصلا اذا كان جدولك مزحوم انك بتحس بالتعب والكسل انك تسوي واجباتك اليومية او مهامك او اياً كان, عشان كذا لازم انت تسوي تقسيم للمهمات اللي عندك عشان تقدر تنجزها وتحاول تسيطر على مشكلة الكسل اللي عندك, وهذي الطريقة اسطورية للمهمات الكبيرة واللي تاخذ وقت اطول.

  • لازم تنام وترتاح وتلعب رياضة

ترا معروف ان الكسل يجيك بسبب انك تحس بالتعب ومافيك حيل تسوي اي شيء وذا كله عشان الطاقة في جسمك منتهيه وفاضية, عشان كذا انت لازم تعطي جسمك وقت للنوم والراحة, ولاتنسى بعد انك لو سويت رياضة بشكل معتدل وتتنفس هواء طبيعي راح يخليك تنهي مسألة الشعور بالتعب والكسل بشكل سريع.

  • لازم تصير متحفز

كثير من المرات تحس مافيه اي دافع يخليك تسوي اي شيء بالحياة, ولكن تقدر تحفز نفسك بنفسك او تخلي شخص ما عزيز عليك انه يحفزك لمهمامك ولكن من الافضل انك تحفز نفسك بذاتك عشان تصير شخص كامل ومتكامل ومثالي.

وش تبي تكون بالمستقبل؟

انت لازم تحدد لك هدف بالحياة وبالمستقبل عشان تحفز نفسك عشانه, وهذا الشيء راح يعطيك دافع انك تتغلب على الكسل والتعب اللي راح يصادفك في طريقك.

  • خلك ايجابي

لما تفكر وتصير ايجالبي راح يساعدك هالشيء انك تعالج الكسل عشان كذا لو صادفتك اي مشاكل وصعوبات بامكانك تحفز نفسك بالكلام والطاقة الايجابية عشان تنجز مهامك بأسرع وقت وبأفضل طريقة .. لاتخلي الطاقة السلبية تكون في طريقك ابداً ياصديقي.

  • فكر بالعواقب

وش يصير لو استسلمت وماصرت تفكر بالهدف المستقبلي حقك؟ بالضبط .. فيه عواقب , هذا العواقب انت لازم تفكر فيها وتخليها دافع لك انك تركز على هدفك الرئيسي عشان تنجزه.

  • كل شيء حبه حبه

لاتحاول انك تسوي مهامك كلها ورا بعض او في وقت واحد لانك كذا ياحبيبي ماراح تخلص ابداً, لازم انك تاخذ الامور حبه حبه عشان تنجز مهامك في افضل صورة ممكنه.

  • لازم تتخيل

بقولك معلومة, تدري ان التخيل له تاثير كبير على النتايج والافعال حقتك؟ عشان كذا انت لازم تستعمل قوة الخيال في علاج الكسل, كل اللي عليك انك تتخيل نفسك انك مسوي كل مهماتك ومخلصها وهالشيء راح يولد قوة ايجابيه تحفيزية قويه مره في جسمك وعقلك.

  • تكلم مع نفسك ( خلك مجنون )

تقدر تتكلم مع نفسك وتقول: انا اقدر اخلص مهماتي, انا انسان اسطوري .. انا انسان محد قدي, انا انسان افضل واحد بالعالم.. هذا الكلام كله له تاثير عليك بشكل ايجابي.

وش نتايج علاج الكسل؟

شوف بقولك شيء , لازم تعرف انك لما تبي تعالج الكسل هالمسألة تاخذ وقت وصبر فلاتصير انسان متسرع وتبي كل شيء يجيك بيوم وليلة .. وهنا بعطيك نصايح لعلاج الكسل وعشان تحصل على افضل نتيجة ممكنة

  • لاتشرب قهوة كثير عشان الكافيين
  • اشرب موية كثير
  • امشي مع نظام غذائي عشان يساعدك تتغلب على الكسل
  • حاول تنام بشكل منتظم
  • لاتدخن ولا تشرب كحول

لازم تعرف انك لما تصاحب ناس غير كسولين هالشيء راح يصب في مصلحتك ياصديقي,هذا كل اللي عندي اليوم, وشكراً

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى